 |
| GARYAQAAN CABDISHAKUUR |
Qaybtii hore ee qaybtan 2aad waxaan ku lafo-guray noocyada
kala duwan ee fal dambiyeedka kufsiga oo kala ahaa: 1. Kufsiga caadiga ah 2.
Kufsi wadareed ama kooxeedka iyo 3. Kufsiga xadgudubka ah. Qaybta 2aad
qaybteedan dambe waxaan kaga hadlayaa falalka xidhiidhka la leh xadgudubyada
ama fal dembiyeedyada galmada ee xeerkan kufsiga ku jira.
1. Qodobka
7aad: Ka Faa’iideysi Galmo (Sexual Exploitation): “(1) Qof kasta oo isagoo ujeedadiisu tahay in uu
hantiyo
macaash lacageed, bulsheed, siyaasaddeed ama faa'iido kale si ula-kac ah: b)
Ku qasba
ama ku
kalifa qof in uu la sameeyo cid kale fal galmo
ah; ama t)
Ku qasba ama ku kalifa qof in uu gacanta u
galo cidkale oo ka leh ujeeddo uga faa'iideysi fal galmo; ama j) Maalgaliya ama iska leh ama maamula ama kireeya goob ama hoy lala tago qofka loo
soo qasbay si loogula kaco
fal galmo ah; ama x) U safriya ama tahriibiya qofkale
gudaha ama xudduuda Jamhuuriyadda
Soomaaliland si uu ugaadho ujeeddo ka faa’iideysi fal galmo; ama kh) si qaldan u
isticmaala xaaladda
nugulnimo ama durruuf dhaqaale bulsheed ee qof kale ,
ama ku
tagri fala meeqaam awoodeed ama
aaminaadeed si uu qofkaasi kale uga gaadho ujeeddo ka faa'iideysi fal-galmo.waxa uu galay fal dambi
ka-faa’iideysi fal-galmo, waxaana uu mutaysanayaa xadhig ciqaabeed u dhaxeeya toban ilaa shan iyo toban sannadood.”
Madmadowga ku jira qodobka: Qodobkani waa mid ka mid ah qodobada ugu muhiimsan isla
markaana loogu baahida badnaa ee ku jira xeerkan cusub. Waxa uu dembi ka
dhigayaa in laga macaasho ama laga ganacsado galmada. Tiirarka uu fal
dambiyeedkani ku dhisan yahay waxaa ugu weyn in la caddeeyo ujeeddada uu
eeddaysanahu fal dambiyeedka u galay in ay ahayd in uu hantiyo macaash lacageed, bulsheed, siyaasaddeed ama faa’iiddo
kale.
Macaash
lacageed waa kelmad macnaheedu cad yahay balse waxa aan caddeyn oo isla
markaana aanu xeerku qeexin macnaha uu xeerku u adeegsaday macaash bulsheed ama siyaasaddeed. Lama garan karo falalka ku
sifoobi kara macnaha labadan kelmadood ilaa la qeexo. Haseyeeshee, marka la
raaco kelmada ka dambeysa ee ah ‘ama
faa’iiddo kale’, waxaa laga fahmayaa in loo baahan in la caddeeyo in ay
jirto dan uu eeddaysanahu ka leeyahay ama ugu jirta galmada uu qofka dhibanaha
ah la samaynayo qof kale.
Waxa
kale oo iyadna u baahan in la fahmo in qodobada 4aad, 5aad iyo 6aad ee Xeerku
ay khuseeyaan noocyada kala duwan ee kufsiga oo ah fal dambiyeedyo ka dhasha
galmo xaaraan ah oo dhex martay laba dhinac – 1) dhinac u galmooday 2) dhinac
kale oo aan raali ka ahayn. Qodobkan 7aad ee ka faa’iideysiga galmadu wuxuu khuseeyaa ugu yaraan saddex dhinac –
1) dhinac ka faa’iiddey galmo
xaaraan ah oo dhex martay laba dhinac oo kala ah 2) dhinac uu ku khasbay ama ku kelifay in uu
galmo la sameeyo 3) dhinaca kale ee qofka loo khasbay ama gacanta loo
geliyey oo ay faa’iiddadu ku xidhan tahay.
Qofka
qodobkan lagu eeddaynayaa waa qofka ka faa’iiddaya galmo ka dhex
dhacaysa laba qof oo kale.
Labada qof ee ay dhex marayso galmadan xaaraanta ah mid qodobku dhibane
ayuu u aqoonsan yahay oo waa qofkan la khasbay ama lagu kelifay galmada, balse halka
uu qodobku ka fool-xumaaday waxay tahay in aanu dembiile u aqoonsanayn qofkan
kale ee uu falka dhan ba dartiis u dhacayo ee loo adeegayo ama macmiilka ah
isla markaana ah qofka galmada ku kacaya.
Bal
aan qodobkan kaga gudbo tusaale kooban oo ka tarjumaya sida qodobkan iyo
xeerkan ba aanay wax badan uga qabanayn aafooyinka galmada xaaraanta ah ee ka
ganacsiga galmada.
Tusaale
ahaan, ganacsade caan ah oo maalqabeen ah ayaa wiil dhallinyar ah oo in muddo
ah bilaa camal ahaa ka shaqaaleysiiyey mid kamid ah shirkadahiisa. Wiilkan
dhallinyarta ah shaqo la’aantii iyo busaaradii uu muddada dheer ku jiray waxay
ku keentay cilad shakhsiyaddeed oo ah in uu si kalsooni-darro ah ugu khidmeeyo odayga
uu u shaqeeyo isagoo ku deddaalaya raaligelintiisa wax kasta oo ay ku qaadato,
si aanu mar dambe bilaa camal u noqon. Taasi oo gaadhsiisay heer uu odayga oo
shabeel naagood ah uu u soo shukaamiyo una soo xero geliyo gabdhaha yar-yar ee
ciyaalo iskuulka ah ama jaamacaddaha ku jira ee ay da’doodu tahay 20 jir ilaa
25 jir. Marka uu hawshaas qabanayo wuxuu kaxeystaa baabuurta odayga kuwooga ugu
bilicda roon, isla markaana wuxuu odaygu siiyaa lacag intii uu u baahdo. Wiilkan
dhallinyarta ah intaas ayuu u arkaa faa’iiddo iyo maslaxad uu odayga ku qabo oo
uu kolba gabadh yar gacanta ugu soo geliyaa isagoo aan khasbayn balse ku
qancinaya oo iyadba ay sidiisa oo kale faa’iiddo u aragto ku xidhnaanta odaygan
lacagta badan ee ay gacantiisu furan tahay. Sidaas baana loo kala muraadsaday
oo ay muddo hawshooda ku socotay ilaa uu odaygu weji cusub u baahday.
Saddexdaas
qofba shareecada marka loo eego waa dembiilayaal shareecada Islaamka ku gefay
isla markaana ku kacay fasaad iyo galmo xaaraan ah oo weliba ka faa’iiddeysi
iyo ka ganacsi galmo lagu tilmaami karo. Haseyeeshee xeerkani dembi kama ba
dhigayo sababtoo ah waa lays ogol yahay oo raali
ayaa layska yahay oo cidna lama khasbin lama na kelifin.
Haddii
wiilka dhallinyarta ah uu gabadha yar soo khasbo oo uu odayguna ka muraadsado.
Qodobkani wiilka oo keliya ayuu qabanayaa ee odaygaa hawshaba u aabbaha ahaa
wax ba loo raaci maayo.
Waxa
dhici karta in dhowaan dhacdadan oo kale, markhaati loo qabsado odaygaas oo
kale marka qodobkan lagu qaadayo dayuuskan yar oo kale oo gabadh yar oo miskiin
ah u soo khasbay odayga markhaatiga ku furaya laftiisa – xeerka ayaa sidaas
ogol oo weliba lagu dooddayaa in uu shareecada waafaqsan yahay isla markaana ay
muwaadiniintu u siman yihiin ciqaabtiisa. Lama sheegin waxa ka dhignaan kara iskudayga
fal dambiyeedka uu qodobkani jidaynayo, runtii annigu ma fahmi karo waxa uu
noqon karo balse waa awood ikhtiyaari ah (discretionary power) oo garsooraha
loo siiyey in uu xukumo wixii uu iskuday u fahmo ama uu iska dayn karo haddii
uu ku qanci waayo.
2. Qodobka
8aad: Ku Xadgudub Jinsi: “(1)
Qofkasta oo ay ujeeddadiisu tahay kicinta ama
qancinta dareenkiisa jinsi ama
dareenka jinsi ee qof kale, si u la kac ah - b ) u fara fareeya jidhka qofkaasi kale oon ogolayn falkaasi, ama qof
kaas kale oo ah cid aan awoodin
bixinta ogolaansho; ama t )
ugu qasba qofkaa kale in uu isaga/iyada fara
fareeyo; ama j ) ugu
qasba cidaa kale in ay is faro fareeyso; Waxa uu galay fal dambi ah ku xad gudub jinsi, ,waxaana uu
mutaysanyaa xadhig ciqaab u dhaxeeya
hal ilaa saddex Sannadood.”
Madmadowga ku jira qodobkan: qaab-qoraalka qodobku si cad ayuu u qoran yahay, kelmada
“fara fareyn” ee uu fal dambiyeedkani ku dhisan yahay wuxuu qodobku ku qeexay; “in qof uu dhunkado, soo qabsado ama isku
dhajiyo, ku tiiriyo ama isku xoqo, salaaxo ama tuutuujiyo jidhka ama xubin ka
mid ah jidhka qofka kale.”
Waa
fal-dembiyeed uu nuxurkiisu cad yahay. Shareeco ahaan malaha ciqaab xad ah
balse waa dembi dhaqan xumo ah oo ay bannaan tahay in xukun tacsiir ah lagu
ciqaabo qofka ku kaca. Haseyeeshee, fal dambiyeedku wuxuu ku kooban yahay fara
fareynta jidhka ee qasabka ah oo keliya oo ma qabanayo dadka iyagu is ogol oo
xeerku uma arko xadgudub jinsi fara fareynta laysla ogol yahay marka laga reebo
fara fareynta carruurta ay da’doodu ka hooseyso 15 jirka oo uu waalidku u
qabsan karo cida falkaas ku kacda.
Waxa
uu muran ka dhalan karaa isku dayga
xadgudubka jinsi sababtoo ah xeerka laguma qeexin, mana cada falalka noqon
kara iskuday fara fareyn qof. Waxay u badan tahay in ay dhici doonto in
qodobkan loo cuskan doono qof kasta oo loo fahmo in uu rabay in uu dhunkado,
qabsado, isku dhejiyo, ku tiiriyo, isku xoqo ama tuujiyo jidhka qof kale balse
ay u suurtogeli weyday. Waxa se shardi ah in la caddeeyo in ujeeddadiisu ay
ahayd kicinta ama qancinta dareenkiisa
jinsi ama dareenka jinsi ee qof kale oo uu isla markaana ka badheedhsanaa
oo uu si ula kac ah iskugu dayey in
uu falkaas ku kaco.
3.
Qodobka 9aad: Guur Qasab ah: “(1) Qof kasta oo, b) ku xadgudba shurruudaha sharci ee ogolaanshaha ama raali ka ahaanshaha
aasaasiga u ah guurka ee ay dhigayaan Shareecad
Islaamka iyo Xeerarka dalku ee si xoog
ama qasab ah ugu guursada qof haween ah; ama t) fududeeya ama qaban qaabiya ama meel mariya
guur isagoo aan xaqiijin ogolaanshaha mid ka mid ah ama dhamaan dhinacyada
guurku khuseeyo sida ay dhigayaan shareecada islaamka iyo xeerarka dalka. Waxa
uu galay fal dambi Guur Qasab ah,
waxaana uu mutaysanayaa xadhig ciqaabeed
u dhaxeeya shan ilaa todoba sannadood”
Madmadow ku jira qodobkan: Qaab-qoraal ahaan wuu cad yahay fal dambiyeedka uu
qodobku qeexayo iyo tiirarkiisu ba. Faqradda 1aad, xaraf-faqraddeedka (b) wuxuu
fal-dembiyeed ka dhigayaa in si xoog ama khasab ah lagu guursado haweenka,
waana fal dambiyeed ay aasaasi u tahay shareecada Islaamku oo ay shardi tahay
in la caddeeyo in xoog ama khasab uu jiray isla markaana aanu guurku ku
dhisnayn ogolaanshaha iyo raali ka ahaanshaha dhinaca haweenayda ama waligeeda.
Hadday arrintu tahay in haweenayda la
guursaday ay raali ka ahayd guurka balse waligeedu aanu raali ka ahayn isla
markaana aanu jirin xoog ama khasab, waxay noqonaysaa in uu meesha ka baxayo
mid kamid ah tiirarka uu fal dambiyeedku ku dhisan yahay oo aan lagu dabaqayn fal
dambiyeedkan. Shareecada Islaamkuna waxay raali ahaanshaha waliga ama qoyska
gabadha ku xidhiidhisay ninka diintiisa
iyo dabcigiisa, waxaanay ka digtay in labadaas wax aan ahayn nin loogu
diiddo gabadh. Rasuulku SCW wuxu yidhi: “Hadduu idiin yimaado nimaad ka raalli
tihiin diintiisa iyo dabcigiisa u guuriya, haddaydan sidaas yeelin waxaa dhacaysa
fidno arlada gudaheeda ah iyo fasahaad weyn” (At-Tirmidi 1084, Ibnu Maajah
1967).
Xaraf-faqraddeedka (t) wuxuu qabanayaa dadka
kale ee fududeeya ama qaban qaabiya ama meel mariya guur iyagoo aan xaqiijin ogolaanshaha mid kamid ah ama dhammaan
dhinacyada uu guurku khuseeyo sida ay dhigayaan Shareecada Islaamka iyo
Xeerarka dalku. Laba nooc ayuu fal dambiyeedkani iskugu jiraa – kuwaas oo kala
ah 1) in dhinac loo fududeeyo, qabanqaabiyo ama meel mariyo guurka iyadoo aan
la xaqiijin raali ahaanshaha dhinaca kale ee uu guurka khuseeyo iyo 2) in iyadoo
aan dadkii uu guurku khuseeyey raali ahaanshahooga la xaqiijin ay dad kale qaban
qaabiyaan guurkooda.
Sidaas darteed, marka hore waa fal-dembiyeed
gacan-siin ama gargaarid ah oo fal dambiyeedka hore ee xarafka b) ku cad lagu
gargaarayo ama lagu kaalmaynayo, waxaanu qabanayaa cid kasta oo qayb ka ahayd
qabsoomida guur xoog ama khasab ku yimid sida waddaadka wax meherinayey oo kale
xitaa haddii aanay ogayn in xoog ama khasab uu jiro sababtoo ah waxaa keliya ee
la caddeynayaa waa in aanay xaqiijin ogolaanshaha iyo raali ahaanshaha dhammaan
dhinacyada uu guurku khuseeyo ee ay Shareecadu waajibisay in raali
ahaanshahooda la xaqiijiyo.
Marka labaad, waxa soo galaya guurka ay laba
qof waalidkoodu qaban-qaabiyaan iyagoo aan xaqiijin raali ahaanshaha labada qof
ama midkood. Shareecadu way ogoshahay in waalidku ay qaban-qaabiyaan guurka
qofka ay waalidka u yihiin gaar ahaan haweenka, balse waxay iyaguna xaq u
leeyihiin in ay ka cudur-daartaan oo raali ahaanshahooda ayuu ku xidhan yahay
guurku. Muhiimadu waxay tahay in qodobkan ay saldhig u tahay shareecadu oo aan
cid loogu qaadi karin si khilaafsan shareecada.
Faqradda 2aad ee Qodobku maaha mid wax ku soo
kordhisay nuxurka qodobka ama la odhan karo way ka duwan tahay faqradda 1aad
sababtoo sida aan kor ku caddeeyey tiirka ugu muhiimsan fal-dambiyeed guurka khasabka ah waa in xoog ama
khasab uu jiro. Waxa cajiib ah in faqraddan 2aad ee qodobku ay cusleyn ka
dhigto isla intaas ku cad faqradda 1aad ee qodobka oo ay odhanayso: “Haddii
cida cisha gashay faldambiyeedka ku xusan faqrada koowaad ee qodobkani uu
adeegsaday xoog ama uu xoog ku maquuniyo wuxuu mutaysaysanaa xadhig
ciqaabeed u dhexeeya todoba ilaa toban sano”. Mar haddii faqradda 1aad ba aanu dembi jirayn haddii aanu meesha ku
jirin adeegsiga xoog ama khasbid muquunis ah, majiro farqi u dhaxeeya labada faqraddood ee qodobka.
Waa macno darro
iyo masuuliyad darro in iyagoo isku nuxur iyo tiirar dembi ba ah laga dhigo
laba fal dambiyeed oo kala culus oo weliba ay ciqaabtoodu aad u kala culus
tahay – faqradda 1aad ciqaabta ay dhigaysaa waa xadhig ciqaabeed hal
sanno ilaa saddex sanno, halka ay faqradda 2aad ka dhigayso ciqaab xadhig
ciqaabeed todoba ilaa toban sanno ah.
4. Qodobka
10aad: Ku Tagrifal Xil ama Masuuliyaddeed: “(1) Qofka haya xil, mas'uuliyad ama meeqaam aamineed ee si ula kac ah u gala fal dambi
kufsi ah oo ka dhan ah qof da'diisu tahay 15 sanno jir ama ka yar,
ama qof naafo ah waxa uu mutaysanayaa xadhig ciqaabeed u dhaxeeya
Labaatan ilaa Shan iyo Labaatan Sannadood.” Iyo faqradda 2aad oo khusaysa marka
qofka noocan ah uu ku kaco fal dambiyeed xadgudub jinsi ah oo isna
mutaysanaya xadhig ciqaabeed u dhaxeeya shan ilaa todobba sannadood.
Madmadowga ku jira Qodobkan: Ugu
horeyn waxaa muhiim ah in la fahmo in qodobkani uu la mid yahay fal
dambiyeedyada kufsiga iyo xadgudubka jinsi gaar ahaan qodobka 4aad faqraddiisa
2aad iyo qodobka 8aad faqraddiisa 3aad. Sidaas darteed, dhammaan dhaliilaha
dhanka qaab qoraalka iyo waafaqsanaanta shareecada wuxuu la wadaagaa qodobada
4aad (kufsiga) oo hore ayaan uga hadlay oo ku noqon maayo.
Haseyeeshee, su’aashu
waxay tahay haddii ba uu fal dambiyeedkani ku cad yahay qodobadaas, maxaa mar
labaad qodob gaar ah looga dhigay? Jawaabtu waa sida cinwaanka ka muuqata qofka
ku kacaya dambiga oo ah qof haya xil, masuuliyad ama meeqaam aamineed ayaa gaar
looga soocay dadka kale ee caadiga ah balse qodobku ma dhigayo fal dambiyeed ka
duwan nuxurka qodobadaas kale.
Faqradda 1aad waxay lamid
tahay qodobka 4aad faqraddiisa 2aad oo waxba kuma kala duwana xitaa ciqaabta
waa iskaga mid. Sidaas darteed, looma ba baahnayn in mar labaad qodob gaar ah
laga dhigo. Balse, faqradda 2aad ee qodobkani waxay kaga duwan tahay qodobka
8aad faqraddiisa 3aad dhinaca ciqaabta oo ciqaabta ugu yar oo ay ahayd xadhig saddex
sanno ah, faqradda 2aad ee qodobkan waxa laga dhigay shan sanno,
halka ciqaabta ugu culus qodobka 8aad faqraddiisa 3aad oo ah shan sanno
laga dhigay todoba sanno.
Waxa isweydiin leh haddii
aanay waxba ku kala duwanayn haddii qof carruur ah uu kufsado qof caadi ah iyo
haddii uu kufsado qof haya xil, masuuliyad ama meeqaam aamineed oo isku ciqaab
loo qoondeeyey, maxay ku kala duwanaadeen marka carruurta xadgudub jinsi loo
geysto?
Waxa kale oo xusid mudan
in fal dambiyeedka kufsiga lagu la kaco qof carruur ah uu tiraba saddex jeer oo
kala gaar ah ku cad yahay xeerkan. Tusaale ahaan, haddii kufsi loo geysto qof carruur
ah ama naafo ah oo uu weliba u galmoodo macalinkii wax u dhigayey, waxa
macalinkaas lagu eeddayn karaa Qod. 4(1.T) sababtoo ah wuxuu u galmooday
qof aan lahayn awoodda ogolaanshaha (carruurta, qofka naafada ah iyo
qofkasta oo uu u galmoodo qof masuuliyad haya ayaa kamid ah sida ku cad Qod.
2aad ee erey-bixinta), waxaanu
muteysan karaa ciqaab xabsi ah oo u dhaxaysa shan iyo toban ilaa labaatan
sannadood.
Sidoo kale waxa lagu eeddayn karaa
faqradda ku xigta ee Qod. 4(2) waxaanu muteysan karaa ciqaab xabsi ah oo u dhaxaysa Labaatan
ilaa Shan iyo Labaatan sannadood, sababtoo ah wuxuu
u galmooday qof carruura oo
da’diisu tahay 15 jir ama ka yar.
Waxa sidoo kale lagu eeddayn karaa Qod. 10(1) oo wuxuu
muteysan karaa ciqaab u dhaxaysa xadhig ciqaabeed Labaatan ilaa Shan iyo
Labaatan Sannadood ah, sababtoo ah waa qof haya
xil, masuuliyad ama meeqaam aamineed.
Waa
saddex fal-dambiyeed oo isku hal dambi ah. Waxaa
ba laga yaabaa in xubnaha garsoorka ah qaarkood u fahmi doonaan in saddexda ba
lagu wada qaadi karo qofkaas oo ay iskugu geyn doonaan saddexda ciqaabood ba. Haseyeeshee,
shareecadda islaamka markay noqoto macalinkaasi waa qof sinnaystay uun waxaanu
muteysanayaa haddii aanu hore guur u soo marin ciqaabta xadka ah ee ku cad Suuratul An-Nuur, aayadda 2aad oo 100 jeedal ah ayaa
laga jari, haddii uu hore wax u soo arkay oo uu guur soo marayna waa la dili oo
la rajmin sida uu jideeyey sunnaha rasuulka SCW iyo khulaafadii Islaamka ee ka
dambeysay ba haddii dembiga loogu caddeeyo sida ay shareecadu waajibinayso.
Faqradda 2aad ee qodobkan oo khusaysa xadgudubka jinsiga ah
ee lagu la kaco carruurtu maaha galmo dhacday. shareeco
ahaana malaha ciqaab xad ah balse waa dembi dhaqan xumo ah oo ay bannaan tahay
in xukun tacsiir ah lagu ciqaabo qofka ku kaca. Waana mid uu xeerku soo
kordhiyey oo loo baahnaa in ciqaabta uu muteysanayo qofka haya xil, masuuliyad
ama meeqaam aamineed laga cusleeyo tan uu muteysanayo qofka caadiga ah ee aanay
xil ama masuuliyadi ka saarnayn qofka uu falka kula kacay. Waana mid uu xeerku
ku ammaanan yahay.
Madmadowga
ugu culus wuxuu ku jiraa qodobkan faqraddiisa 3aad oo dhigaysa wax aan annigu
fahmi waayey dhan alla dhan aan u qaado. Xaraf-faqraddeedka b) wuxuu dhigayaa
in ‘qofka haya xil, masuuliyad ama
meeqaam aamineed ee gala fal dambiyeedka ay dhigayso faqradda 1aad ee qodobkan uu
muteysanayo xadhig ciqaabeed u dhaxeeya todoba ilaa toban sanno.” Xaraf-faqraddeedka
t) wuxu isna dhigayayaa in “qofka haya
xil, masuuliyad ama meeqaam aamineed ee gala fal dambiyeedka ay dhigayso
faqradda 2aad ee qodobkan uu muteysanayo xadhig ciqaabeed u dhaxeeya laba ilaa afar
sanno.”
Faqraddaha
1aad iyo 2aad fal dambiyeedyada ay dhigayaan ciqaabtoodu iyaga laftooda ayey ku
cadahay. Faqraddan 3aadna isla fal dambiyeedyadaas ayey u jidaynaysaa ciqaab
aad uga hooseysa ciqaabta faqraddahaas ku cad, waana isku hal qodob. Sidaas darteed,
waaba yaabka yaabkii se ma cillad farsamaa oo iskudayga fal-dambiyeedyada
faqraddahaas ku cad ayay ujeeddadu ahayd? Mise waa ujeeddo kale oo loogu
talogaley in ciqaabta dembiga lagaga khafiifinayo dadka xilalka iyo
masuuliyadda haya ee kufsiga iyo xadgudub jinsi u geysta carruurta? Mooji! Annigu
kolay ba xukumi maayo dadka laabtooda wixii ku jiray balse ku darsoo weliba
sidaasaa xeerka loo soo bandhigay qaybaha bulshada isla markaana uu sidoo kale
goleyaasha baarlamaanka iyo Madaxweynaha ba soo maray – haddadan aynu joogno waa
xeer dhaqangal ah. Iyadna waa tabaalaha wakhtigan aynu aragnaaye halkaa ha
innoogu joogto. Waa innoo todobaadka dambe iyo qaybaha innooga hadhay xeerka
haddii Alle SWT uu innagu simo.
Qalinkii:
Garyaqaan Cabdishakuur Cali Muxumed (Good Lawyer)
Email: goodlawyer2014@gmail.com
Burco/Hargeysa,
Soomaaliland
No comments:
Post a Comment