MAANSO: MUJAAHID DHIIRRANE

Maansadani Mujaahid Dhiirrane waxaa curiyey Abwaan Muxiyadin Cali Cabdillahi (Xabashi), waxay salka ku haysaa qisadda ay ka hadlayso sheekada gaaban ee Dhiirrane: Mujaahidkii Waashay oo uu qoray Garyaqaan Cabdishakuur Cali Muxumed (Good Lawyer). Sheekadani oo ka hadlaysa dhibaatooyinka, abaal ka dhaca, iyo duruufaha haysta Mujaahidiintii SNM ee nafahoogii iyo maalkoogii ba u huray Madax-banaanida Soomaaliland. Waxay tidhi:

Dharaar milicdu kulushahay

Dhulku uu kaliil yahay

Nafluhu na dhammaantii,

Dhirta uu ka hoos galay

Dhabaduu ordaayoo,

Dhanna ugama baydhayn

Dhafoorkiisa gaajiyo,

Dhidid baa ka muuqdoo,

Dhibta iyo xanuunkaad,

Dhinacyada ka aragtaa.

Dhexda wuu ka liicaa

Dhibica iyo roobkiyo,

Kama hooydo dhaxamaha

Waa nin aad u dhilanoo,

Lafo dhererran weeyaan

Dharka wuu ka madhan yahay

Dhabtii wuu caggaagnaa

Kelmad buu ku dhegayoon,

Carabkiisa dhaafayn

“Afweynaan xabaal dhigay

Dhulka waan xorreeyoo,

Waan dhawray diintana

Ummaddana dhammaantood,

Iyagoo hog dheeriyo,

Ku dhacaaya bohol baan,

Dhiiggayga daadshoon,

Gacmahayga uga dhigay”

Dhoolahuu cadeeyoo,

Wuxuuu yidhi:

“Dhammaantood abaal kama dhawree,

Bahalkaan dhaqaajiyo,

Dhurwaagii I cunayaa,

Ii dhaamay annigee,

Ninka dharegsan baw u daran!"

Ilaa dhalashadiisii,

Isagoo dhallaanuu,

Gobonnimo u dhiidhiyey

Wuxuu dhinac ka taagnaa

Dhidibkii xornimadiyo,

Isticmaarkii dhaadhacay

Dabadeed dhankiisii,

Ayuu dheeli-tirayoo,

Dawladdeenii dhalatuu,

Dhab u raacsanaayoo,

Ciidankii dhismaayuu,

Dhinacaa ka soo galay

Markuu joogay dhawr sano

Hantidoo la dhacay iyo

Markii sheekh cilmiga dhiga

Dhalinyarriyo waayeel

La dhirbaaxay maatada

Xilka kay u dhiibteen

Intuu ceel ka dhaansaday

Dhigtay oo ku talax tegay

Dhegta dhiigga wax u daray

Ee geesi dhaatiyo,

Dhoorray la daynayn

Dhiirrane is hayn waa’

Dabadeed dhuumay oo socoy

Wuxuu guuro dheer maro

Oo uu dhawro jaanta ba

Estii buu dhex tegay galab

Dhaqdhaqaaq xornimo-doon

Mar labaad is dhaarsade

Waa geesi dhego nugul

Kama laabto dhimashada

Jaan dhawrka raacdada

Dhirta baadh sidii aar

Dhamacdiyo dabka ba jiidh

Wax kastoo ku dhacaya ba

Wuu u dhabar-adaygaa

Dhaldhalaal qurxooniyo

Ma yaqaano dhaashiga

Dheefaha la quutana

Xabad baa u dhuuniya

Dhuuxisii buu shubay

Dhib kastaa ha gaadhee

Soo dhici xornimo kale

Intuu qaaday dhagaxii

Dhunkay cidii hooyana

Farxad buu la dhaygagay

Dhan kaluu jaleecoo

Naxdin buu dhamaystoo

Ilmaa qoysay dhabanada

Inta wiil dhigiisa ah

Dhiigiisu saydhmee

Hilbihiisa dhuuryiyo

Looga tagay dhurwaagee

Lafihiisa dhuuxeen

Dhismihii dalkeenoo

Aan daar dhalaashiyo

Guri dhumucli taagnayn

Duco dhaafi murugada

Intii dhimatay eebow

Ka dheeree cadaabtoo

Jano aan dhamaanyo

Dhex gee beero dhawrsoon

Dhinac kale haddana eeg

Dhalintii iskuulkoo

Wax u dhiga u baahnayd

Aqoontii ka dharag sii

Kama dhuunto hawshee

Haddba meesha dhiman buu

Dhinaceeda joogaa

Siduu yahay dhamaha awr

Ubadkuu u dhaanshaa

Dhanka kale hadana eeg

Dhudhunka iyo xoogiyo

Lafta dhabarka haysee

Dawladuhu ku dhaataa

Waa ciidan dhaarsane

Dhiniciisa kaga fayl

Wuxuu sugayey dhawr sano

Intii dhimatay waa hore

Ubadkay dhaleeniyo

Dhabarkiyo laxaadkiyo

Dhaayaha intaan hayn

Ururkii dhamaantii

In mar uun la dheehdoo

Laga dhawro hadimada

Oo dhaxal maqnaa iyo

Dhiilkoodu buuxsamo

Talladuu dhisaayiyo

Dhicisow warkiisii

Noshuna dhadhaab iyo

Dhagax iyo bir weeyaan

Ma ogtahay dhaqaaliyo

Dhisme iyo tukaan iyo

Wax la dheefto kama naxo

Dharaarbaa caruurtii

Dhiganaysay barashada

Lagu yidhi na dhaafa

Ama dhiiba lacagtaad

Dugsiga aad ku dhigataan

Ubadkii dhaqaaqyoo

Gurigii u dhaadhace

Dhiiranaa ka xeeyoo

 Iskuul kii dhextagayoo

Barihii u dhigayuu

Warkiisii u dhiiboo

Wuxu yidhi: “Dhagaysoo

Dhagta ii yar raarici

Ilaa maalinkaan dhalay

Dhulka waw u shaqeeyaa

Dheef roona kuma qabo

Anaa dhiibi lacagtee

Ha ii dhigtaane ii daa”

Ku dhamee warkii sii

Waa yahee dhakhso u keen

Dhawr cishaan ku sugayaa

Isna dhaafsay hadalkaas

Dhalandhoolka waayaha

 Isagoo dhibsanayuu

Dhako-faar ka qaadkii

Soo dhaqaajay kaligii

Kolkuu marayo meel dhexe

Dhakhtarkana ku dhawyahay

Gabadh baw dhawaaqdoo

Dhankeeduu jaleecoo

Wadadii is dhinac taag

“Waar Dhiiranow maqal

Agoontii aan dhalay baa

Dhakhtarkani mid yaalaa

Kalyahay mid dhimatoo

Haddaynaan dhakhso u qalin

Xabaal buu u dhawyahay

Dhakhtaradu yidhaahdeen

Lacag baana dhinac taal”

Dhiirranoo jeclaa abid

Dawladeenii dhalataa,

Soo dhiibay oo yidhi:

“Oo miyaanu Dhooleey

Dhakhtar dawladdeed jirin?”

Dhab u sheegtay hadalkoo

“Dhisme dawlo weeyo,o

Maal lagama dhiibee,

Dhayahaa la siiyaa”

Dhiirrane hore u socoy

Dhawr odayna sii raac

Dhakhtarkii daf loo yidhi

Dhiirrane bilaw hadal

“Dhakhtaroow ina adeer

Dhulkaan maanta joogneen,

Xornimadu dhab u taal

Raggii dhaliyey baan ahay

Inan kaa dhul yaal ka ah

Walaaloow, ninkii dhalay

Ma dhex joogo uunkee,

Aakhiruu u dhaadhacay

Oo dhulkeena hooyuu,

Dhigiisii siiyee,

Dhakhtaroow ogsoonoow!

Haddii aanu dhimanoo

Ifka uu dhex joogi laa’

Dhinac uu ka keen ba

Adduunkaa dhammaantii

Wuu dhiibi laa’ garo

Haddaan maal ku dhaamana

Dhana ugama baydheen

Adigaa dhakhtar u ah

Aqoontaad na dheertiyo

Dhudhumaha na siiyo

Dhamee hawsha saaxiib”

Dhakhtarkii wuxuu yidhi:

“Nin Mujaahid dhalay iyo

Dhadigiyo laboodkiyo

Ninkii dhoof ka yimid iyo

Dadweynaha dhammaantii

Dhakhtarkani waw siman yahay

Ama dhiiba lacagtoo

Anna aan dhaqso u qalo

Ama dhaafa meeshoo

Dhawaaqiina iga xidha”

Dhiirraniyo colkiisii

U dhaqaaqe suuqoo

Nin ba dhinac u sii luud

Dhaqaalahii la soo qaad

Dhakhtarkiina lagu noqoy

Wax se dhacay nasiibkee

Dhimay wiilkii goortaa

Dhiirrane warkii maqal

Dhabanada gacmaha saar

Dhidid oo qamuunyoo

Xasuus dheer dib ugu noqoy

Dhigay oo maryaha tuur

Gacal iyo xigaal dhaaf

Ilaa iyo dharaartaa

dhana laguma tirinayn.